Author: Edilberto Angco
Mapusek barukongko iti linnaaw
Ti parbangon namaris a parmata
Ket ti mainaw a riknak maibuyog iti sin-aw
Ken imnas iti kassangbay nga agsapa.
Bumangonak iti essem a busel ‘toy pusok
A mangidayyeng namnama a ray-aw
Kinataok nga aglupos iti bukodko a lubong
Tapno ruknoyak iti ayamuom ti panawen.
Ngem kapadpadko sanga iti nababa a langit,
Masip-ak iti allikubeng nadamsak nga angina;
Ngem dagiti saringit, we, dagiti saringit
Agsampagadanto iti sabali nga iririing.
Source:
Ilocanosphere, http://saluyot.wordpress.com/
