Kapampangan – E Ku Karapat-Dapat

Author: Roy

Metung na yatang librong tula, para keka ing agawa
Ala ku pa rin dimdam ni metung mang salita
O't e ka mo sana adyang saguli malikid
Ba mu sanang aintindian ing panamdaman a sakit

Sibukan ku na rin ing menarana
Iyampang ko keka reng sinluat kung kanta
Adyang mengari ku mung tugak keng kauran
Ni e da ka man yata ikwang apatiman

Meging laman na na ka rin ning istorya
A sinulat na ning magma-makata
Tungkul pa rin king lugud alang kapupusan
Kasanting na sana nung maging yang katutuan

Minsan muman kaya king kekang panimanman
Ing kanakung lagyu meging yang laman?
Poesia ampong dalit a kakung linatag
Atin ka mo kayang atatandanan?

Siguro kailangan ku nang tanggapan ing katutan
Adyang maplas pa king kanakung piublubhan
Ing upaya ku, tutu yanng e masampat
Anya pin para keka, e ku karapat-dapat.

 

Source:
Kapampangan Blog, http://kapampanganblog.com