Author: Dan Niel Tagupa
Igudagodko latta ‘toy pluma
A makirinnisiris iti papel
Tapno mabukel dagiti binatog
Agbalikas kas obra maestra.
Bay-ak nga agayus ti tinta
Tapno maputar dagiti linia
A mangkigtot kadagiti santilmo
Nga agparang iti agmatuon.
Diak met a lapdan nga agikur-it
Dagiti agpigpigerger nga ima
Tunggal aglayus dagiti balikas
A manglapunos rikna a naiwawa.
Wen ta dinto magawidan
Dagiti sabong-panunot
A rumkus iti kaunggan
Tunggal imatak dagitoy matak.
Agingga nga adda dagiti masisirib
A mangsikap kadagiti kuneng; aginkukuneng
Makinnirisiris latta toy pluma
Iti nagalis, sumilsileng a papel.
Source:
Ilocanosphere, http://saluyot.wordpress.com
