Cebuano – Burger Steak

Author: Candido O. Wenceslao

Abi ba to nakog lami
Ang burger steak.
Naunsa ba nga nausab man ang timplada
Dihang nakit-an tika sa sidewalk
Nga ikaw rang usa.

Ang sip-on sa imong simod
Mimakra sa samin
Nga pwerte pang sinawa.
Pero wa kang kabantay
Kay ang imong mata nagtutok man
Sa plastic nakong tinidor
Ug kutsara.

Kun ako pay imong Papa
Gikaligo na tika
Ug gipalitag maong nga jumper
Sa Ayala.
Daghan untang masuya
Nga duna koy liwat
Nga morag si Lady Lee
Kagwapa.

Paeskwelahon tika
Og kinder sa Evanfree
Kay mao ra may kaya
Sa akong bulsa.
Unya sa elementary
Sa City Central lang tingali
Kay duol ra sa amoa.

Kun makaya sa high school
Nindot untag sa Santa Theresa.
Pero fight ra gihapon sa Abellana
Kay dinha man mi
Kasagarang mangeskwela.

Unya sa college magpili na ta
Sa Southwestern ba, sa UC
Sa San Jose ug bisan sa UV.
Basta kay maninguha lagi ko
Nga makatapos ka’g kurso
Aron sab dayon
Makatrabaho.

Pero taym pa
Morag nanobra na man
Ning akong arangkada.
Nakalimot ko nga
Hapit na mahurot ang burger steak
Nga wa ko ka pangagda.

Wa gani ko kabantay
Nga ikaw nakalakaw na
Unya kusmod
Ug huyhoy ang abaga.

 

Source:
Rebelmind, http://cebuano.wordpress.com

 

Photo of the Week

Crowd gathers to watch tree lighting ceremony in Fairview Ayala Terraces, Quezon City

Crowd gathers to watch tree lighting ceremony in Fairview Ayala Terraces, Quezon City

Donate your article, news, poetry, photos or anything about the Philippines!
 

For Questions and Comments send us an email.
 

World Connections