Caviteño Chavacano – Piesta

Author: Eliodoro Ballesteros

Para todu el mana visita qui ta viní
na piesta di la Vilgen de la Soledad,
patrona del ciudad di Cavite.
El piesta di Cavite el más alegri piesta 
Qui aquí na esti pruvincia nisós ta celebrá,
Polqui na mucho casa cun baile y olquesta.
Todu el mundu cuntenti, pues todu ta  alegrá.
Musica banda banda, jeepney, auto y calesa  
Ta circulá un calli desdi el amanecel,            
Qui ta causá cun todu gran dolol de cabeza
Y qui para algunus alegrías y placel.
Todu el calli principal y adentro del iglesia     
Llenong‑lleno di genti y nuay dondi pasá, 
Pues el qui ta padecí di ataqui di epilepsia      
Puedi acabá el risuello y su muelte causá.    
El visita, anti todu, ta viní na Cavite               
Polqui diviltí quieri na aquesti ciudad,            
Qui al lligal insiguida, más qui nuay cunvite       
Ta andá rezá primeru ante la Soledad.
Na plaza el maná vieju, el jovin y el muchachu
Ta dali dali vuelta para ilós diviltí.                  
Mientras na un isquina algún qui otru borrachu
Cun el pulís ta pulpiá; cun todu ta imbistí.
Al lligal a las doce, cun prialdad di calambri,   
El maná genti ta andá buscá algun qui comel
Y si nuay cunucidu, para pasá su hambri        
Na restauran ta llivá cun su suegra y mujel. 
Al acabal di ciná y llenu ya el barriga,        
Di andá na castillu dispués del prusición,
Allá el mandurukut y el mana siga-siga         
Su agosto ta hací cun gran satispacción   
Amigu e porasteru: Aunqui cun disingañu
Qui ta incuntrá al viní na piesta di nisós
cun puntualidad siempri viní di añu en añu
Qui el puelta di Cavite ta abielto para vusós.
 
 
Source:
Chabacano El Lenguaje Di Niso, http://www.angelfire.com/

 

Photo of the Week

Crowd gathers to watch tree lighting ceremony in Fairview Ayala Terraces, Quezon City

Crowd gathers to watch tree lighting ceremony in Fairview Ayala Terraces, Quezon City

Donate your article, news, poetry, photos or anything about the Philippines!
 

For Questions and Comments send us an email.
 

World Connections